kabhi kisi ne jo dil dukhaya to dil ko samjha gai udasi

kabhī kisī ne jo dil dukhāyā to dil ko samjhā ga.ī udāsī

mohabbatoñ ke usuul saare hameñ bhī sikhlā ga.ī udāsī

tumheñ jo sochā to mere dil se udāsiyoñ kā hujūm guzrā

kabhī kabhī to huā hai yuuñ bhī ki be-sabab chhā ga.ī udāsī

paḌī huī thī niDhāl ho kar hamārī āñkhoñ ke āñganoñ meñ

kisī kī aahaT sunī to chauñkī zarā sī ghabrā ga.ī udāsī

zarā sī duurī pe baiTh kar vo nigāh mujh se milā rahī thī

jo apnī bāñhoñ meñ bhar liyā to adā se sharmā ga.ī udāsī

vo daur bhī thā ki fāsloñ se guzar rahī thī nadī kī sūrat

na jaane kis kī duā hai yāroñ ki mujh meñ bhī aa ga.ī udāsī

na jaane kin pahluoñ meñ rah kar huī hai gahrī mirī udāsī

na jaane kin kin laboñ se pī kar ye zindagī pā ga.ī udāsī

milī thī jis din lagā thā yuuñ ke nahīñ banegī kabhī hamārī

jo saath ham ne bitā.e kuchh din to ek din bhā ga.ī udāsī

kabhi kisi ne jo dil dukhaya to dil ko samjha gai udasi

mohabbaton ke usul sare hamein bhi sikhla gai udasi

tumhein jo socha to mere dil se udasiyon ka hujum guzra

kabhi kabhi to hua hai yun bhi ki be-sabab chha gai udasi

paDi hui thi niDhaal ho kar hamari aankhon ke aanganon mein

kisi ki aahaT suni to chaunki zara si ghabra gai udasi

zara si duri pe baiTh kar wo nigah mujh se mila rahi thi

jo apni banhon mein bhar liya to ada se sharma gai udasi

wo daur bhi tha ki faslon se guzar rahi thi nadi ki surat

na jaane kis ki dua hai yaron ki mujh mein bhi aa gai udasi

na jaane kin pahluon mein rah kar hui hai gahri meri udasi

na jaane kin kin labon se pi kar ye zindagi pa gai udasi

mili thi jis din laga tha yun ke nahin banegi kabhi hamari

jo sath hum ne bitae kuchh din to ek din bha gai udasi