kabhi lagawaT kabhi adawat mujhe ijazat

kabhī lagāvaT kabhī adāvat mujhe ijāzat

tujhe hai sūjhī na.ī sharārat mujhe ijāzat

maiñ aa.ine ko qarīb lā ke zarā jo rakkhūñ

badalne lagtī hai terī sūrat mujhe ijāzat

har ek tujh ko bahut hai pyārā bahut hī pyārā

maiñ jāntā huuñ ye terī aadat mujhe ijāzat

tirī talab meñ jahān saarā yahāñ khaḌā hai

mujhe ijāzat mujhe ijāzat mujhe ijāzat

tumhāre lahje kī sard-mehrī to kam na hogī

ThiThur ga.ī hai mirī samā.at mujhe ijāzat

yahāñ to bas haiñ tamām dānish-varān-e-ulfat

sunūñ maiñ kis kis kī ab ḳhitābat mujhe ijāzat

maiñ apne hāthoñ se likkhe kāġhaz jalā.ūñ kaise

tujhe mubārak tirī ye jur.at mujhe ijāzat

koī gila hai na koī shikva na koī ranjish

jahāñ raho tum raho salāmat mujhe ijāzat

badal badal ke charāġh rakkhe haiñ tāqchoñ par

qubūliyat kī na aa.ī saa.at mujhe ijāzat

pukār lenā bilā-jhijak tum mujhe kahīñ bhī

agar paḌe jo mirī zarūrat mujhe ijāzat

kabhi lagawaT kabhi adawat mujhe ijazat

tujhe hai sujhi nai shararat mujhe ijazat

main aaine ko qarib la ke zara jo rakkhun

badalne lagti hai teri surat mujhe ijazat

har ek tujh ko bahut hai pyara bahut hi pyara

main jaanta hun ye teri aadat mujhe ijazat

teri talab mein jahan sara yahan khaDa hai

mujhe ijazat mujhe ijazat mujhe ijazat

tumhaare lahje ki sard-mehri to kam na hogi

ThiThur gai hai meri samaat mujhe ijazat

yahan to bas hain tamam danish-waran-e-ulfat

sunun main kis kis ki ab KHitabat mujhe ijazat

main apne hathon se likkhe kaghaz jalaun kaise

tujhe mubarak teri ye jurat mujhe ijazat

koi gila hai na koi shikwa na koi ranjish

jahan raho tum raho salamat mujhe ijazat

badal badal ke charagh rakkhe hain taqchon par

qubuliyat ki na aai saat mujhe ijazat

pukar lena bila-jhijak tum mujhe kahin bhi

agar paDe jo meri zarurat mujhe ijazat