کبھی ماضی کبھی فردا سے ڈرایا ہے مجھے

کبھی ماضی کبھی فردا سے ڈرایا ہے مجھے

کیسا فرزانوں نے دیوانہ بنایا ہے مجھے

زندگی تیری عنایات کا حاصل یہ ہے

ایک قاتل ہے کہ اپنا نظر آیا ہے مجھے

جانے کیا بات ہے تاریخ نے بادیدۂ تر

میرا افسانہ کئی بار سنایا ہے مجھے

مجھ سے ظلمت کدۂ غم کی عنایت پوچھو

کتنے سایوں کے تعاقب سے بچایا ہے مجھے

اب نہ وہ جام نہ وہ پیاس نہ وہ سوز طلب

سرد جب ہو گئی محفل تو جگایا ہے مجھے

میں نہ قاتل ہوں نہ مقتول نہ منصف یارب

کس لیے عرصۂ محشر میں بلایا ہے مجھے

میرے چہرے پہ نہ تھیں اتنی خراشیں یارو

تم نے ٹوٹا ہوا آئینہ دکھایا ہے مجھے

کل تھا مسجود نظر آج تماشہ ہوں شمیمؔ

کس قیامت کی بلندی سے گرایا ہے مجھے