kabhi madhur kabhi miThi zaban ka shair hun

kabhī madhur kabhī mīThī zabāñ kā shā'ir huuñ

isī sanad se maiñ hindostāñ kā shā'ir huuñ

dikheñge mujh meñ tumheñ zaḳhm ghaav dono hī

ḳhilāf-e-zulm ke aajiz bayāñ kā shā'ir huuñ

maiñ apnī fikr ko mahdūd rakh nahīñ saktā

zamīn-o-arsh makīn-o-makāñ kā shā'ir huuñ

gumān kahtā hai ke maiñ yaqīñ kā shā'ir huuñ

yaqīn kahtā hai ke maiñ gumāñ kā shā'ir huuñ

jahāñ hai zarra qamar aur jahāñ qamar zarra

maiñ us zamīñ kā maiñ us āsmāñ kā kā shā'ir huuñ

abhī mujhe na suḳhanvar kaho mire ahbāb

abhī suḳhan meñ faqat imtihāñ kā shā'ir huuñ

mujhe na dekho yuuñ nafrat bharī nigāhoñ se

maiñ 'hāshmī' huuñ maiñ amn-o-amāñ kā shā'ir huuñ

kabhi madhur kabhi miThi zaban ka sha'ir hun

isi sanad se main hindostan ka sha'ir hun

dikhenge mujh mein tumhein zaKHm ghaw dono hi

KHilaf-e-zulm ke aajiz bayan ka sha'ir hun

main apni fikr ko mahdud rakh nahin sakta

zamin-o-arsh makin-o-makan ka sha'ir hun

guman kahta hai ke main yaqin ka sha'ir hun

yaqin kahta hai ke main guman ka sha'ir hun

jahan hai zarra qamar aur jahan qamar zarra

main us zamin ka main us aasman ka ka sha'ir hun

abhi mujhe na suKHanwar kaho mere ahbab

abhi suKHan mein faqat imtihan ka sha'ir hun

mujhe na dekho yun nafrat bhari nigahon se

main 'hashmi' hun main amn-o-aman ka sha'ir hun