kabhi makan mein kabhi rahguzar mein rahte the

kabhī makāñ meñ kabhī rahguzar meñ rahte the

ye roz-o-shab to hamesha nazar meñ rahte the

havā kī raah meñ uḌtī thī zindagī apnī

misāl-e-mauj kabhī ham bhañvar meñ rahte the

mohabbatoñ meñ bahut dil dhaḌaktā rahtā thā

ajiib log dil-e-mo'tabar meñ rahte the

hameñ bhī shauq thā kuchh titliyāñ pakaḌne kā

tamām rañg magar chashm-e-tar meñ rahte the

ḳhizāñ se pahle yahāñ kā ajiib mausam thā

samar kī tarah parinde shajar meñ rahte the

gurez-pā.ī kā shikva kareñ to kis se kareñ

safar meñ rah ke bhī ham log ghar meñ rahte the

havā ke saath zamāna badal gayā hai 'razī'

hamīñ the vo jo kabhī is nazar meñ rahte the

kabhi makan mein kabhi rahguzar mein rahte the

ye roz-o-shab to hamesha nazar mein rahte the

hawa ki rah mein uDti thi zindagi apni

misal-e-mauj kabhi hum bhanwar mein rahte the

mohabbaton mein bahut dil dhaDakta rahta tha

ajib log dil-e-mo'tabar mein rahte the

hamein bhi shauq tha kuchh titliyan pakaDne ka

tamam rang magar chashm-e-tar mein rahte the

KHizan se pahle yahan ka ajib mausam tha

samar ki tarah parinde shajar mein rahte the

gurez-pai ka shikwa karen to kis se karen

safar mein rah ke bhi hum log ghar mein rahte the

hawa ke sath zamana badal gaya hai 'razi'

hamin the wo jo kabhi is nazar mein rahte the