kabhi mastur rahti hai kabhi malum hoti hai

kabhī mastūr rahtī hai kabhī ma.alūm hotī hai

tajallī ik fareb-e-āgahī ma.alūm hotī hai

karishma-sāzī-e-vāraftagī ma.alūm hotī hai

nigāh-e-shauq terī aarsī ma.alūm hotī hai

nasheman par ye aafat bhī na.ī ma.alūm hotī hai

fazā meñ ik taḌaptī raushnī ma.alūm hotī hai

jo īsār-o-mohabbat kī kamī ma.alūm hotī hai

ye duniyā daulat-e-dil se tahī ma.alūm hotī hai

tire qurbāñ pasīna poñchh māthe se nadāmat kā

ki ThanDī dhuup phīkī chāñdnī ma.alūm hotī hai

yaqīnan ābla-pā koī guzrā hai bayābāñ se

zamīñ jaltī hai kāñToñ meñ namī ma.alūm hotī hai

ḳhudā jaane likhā ahl-e-vafā ne kaisā afsāna

zamāna ho gayā baat aaj kī ma.alūm hotī hai

yahāñ kis se mudāvā chāhūñ apne dard kā 'nātiq'

mujhe to saarī duniyā ajnabī ma.alūm hotī hai

kabhi mastur rahti hai kabhi malum hoti hai

tajalli ek fareb-e-agahi malum hoti hai

karishma-sazi-e-waraftagi malum hoti hai

nigah-e-shauq teri aarsi malum hoti hai

nasheman par ye aafat bhi nai malum hoti hai

faza mein ek taDapti raushni malum hoti hai

jo isar-o-mohabbat ki kami malum hoti hai

ye duniya daulat-e-dil se tahi malum hoti hai

tere qurban pasina ponchh mathe se nadamat ka

ki ThanDi dhup phiki chandni malum hoti hai

yaqinan aabla-pa koi guzra hai bayaban se

zamin jalti hai kanTon mein nami malum hoti hai

KHuda jaane likha ahl-e-wafa ne kaisa afsana

zamana ho gaya baat aaj ki malum hoti hai

yahan kis se mudawa chahun apne dard ka 'natiq'

mujhe to sari duniya ajnabi malum hoti hai