kabhi na aasuda-e-amal ho magar irada bhi kam nahin hai

kabhī na āsūda-e-amal ho magar irāda bhī kam nahīñ hai

aur is irāde kā ūñchī āvāz meñ i.aada bhī kam nahīñ hai

shahanshah-e-vaqt aur darbārī apne suud o ziyāñ se vāqif

sarīr-ārā-e-saltanat koī ḳhānvāda bhī kam nahīñ hai

asā-e-farmāñ-ravā.ī jaadū jagā.e jis taur bhī ravā hai

rumūz-e-asrār-e-hukmarānī meñ shāhzāda bhī kam nahīñ hai

koī rakhe be-jahat safar meñ masāfatoñ kā hisāb kaise

ki tausan-e-be-zamām ko be-nishān jaada bhī kam nahīñ hai

yahī bahut hai kisī tarah se bharam hī rah jaa.e pesh duniyā

agar mayassar nahīñ hai baada ḳhayāl-e-bāda bhī kam nahīñ hai

mujh aise uftād-gāñ kī Dhāras na jaane kaise bañdhī huī hai

pahāḌ sī umr kāTne ko ye zehn-e-sāda bhī kam nahīñ hai

kisī kā khoTā nasīb 'yāsir' kise ḳhabar kis ghaḌī kharā ho

julūs-e-shāhī ke saath ik be-zabāñ piyāda bhī kam nahīñ hai

kabhi na aasuda-e-amal ho magar irada bhi kam nahin hai

aur is irade ka unchi aawaz mein iada bhi kam nahin hai

shahanshah-e-waqt aur darbari apne sud o ziyan se waqif

sarir-ara-e-saltanat koi KHanwada bhi kam nahin hai

asa-e-farman-rawai jadu jagae jis taur bhi rawa hai

rumuz-e-asrar-e-hukmarani mein shahzada bhi kam nahin hai

koi rakhe be-jahat safar mein masafaton ka hisab kaise

ki tausan-e-be-zamam ko be-nishan jada bhi kam nahin hai

yahi bahut hai kisi tarah se bharam hi rah jae pesh duniya

agar mayassar nahin hai baada KHayal-e-baada bhi kam nahin hai

mujh aise uftad-gan ki Dhaaras na jaane kaise bandhi hui hai

pahaD si umr kaTne ko ye zehn-e-sada bhi kam nahin hai

kisi ka khoTa nasib 'yasir' kise KHabar kis ghaDi khara ho

julus-e-shahi ke sath ek be-zaban piyaada bhi kam nahin hai