kabhi na lahr ban saka bahaw mein guzar gaya

kabhī na lahr ban sakā bahāv meñ guzar gayā

sukūñ kī aarzū liye tanāv meñ guzar gayā

guzar ga.ī tamām umr jis kī aarzū liye

vo lamha-e-visāl rakh-rakhāv meñ guzar gayā

kabhī koī hasīñ lagā kabhī koī hasīn-tar

mirā shabāb husn ke chunāv meñ guzar gayā

sitam ki bahr-e-ishq meñ kabhī na maiñ utar sakā

mirā safar to hasratoñ kī naav meñ guzar gayā

mufāhamat kā dars jo shikam kī aag se milā

so āfatoñ kā daur sab jhukāv meñ guzar gayā

tamām umr jis sabab ghamanD tujh ko thā bahut

vo māl-o-zar tire hī bach-bachāv meñ guzar gayā

maiñ ajnabī ke haath tere sāmne hī bik gayā

tirā tamām vaqt bhāv-tāv meñ guzar gayā

na ham-safar milā mujhe na koī rāsta milā

paḌāv meñ janam huā paḌāv meñ guzar gayā

kabhi na lahr ban saka bahaw mein guzar gaya

sukun ki aarzu liye tanaw mein guzar gaya

guzar gai tamam umr jis ki aarzu liye

wo lamha-e-visal rakh-rakhaw mein guzar gaya

kabhi koi hasin laga kabhi koi hasin-tar

mera shabab husn ke chunaw mein guzar gaya

sitam ki bahr-e-ishq mein kabhi na main utar saka

mera safar to hasraton ki naw mein guzar gaya

mufahamat ka dars jo shikam ki aag se mila

so aafaton ka daur sab jhukaw mein guzar gaya

tamam umr jis sabab ghamanD tujh ko tha bahut

wo mal-o-zar tere hi bach-bachaw mein guzar gaya

main ajnabi ke hath tere samne hi bik gaya

tera tamam waqt bhaw-taw mein guzar gaya

na ham-safar mila mujhe na koi rasta mila

paDaw mein janam hua paDaw mein guzar gaya