kabhi nazr-e-mashq-e-suKHan kiya kabhi aansuon mein baha diya

kabhī nazr-e-mashq-e-suḳhan kiyā kabhī āñsuoñ meñ bahā diyā

ki hamāre sar ġham-e-āgahī kā jo qarz thā so chukā diyā

maiñ huuñ mah-e-vaqt kā ham-nasab maiñ tulū-e-sahar kā huuñ sabab

maiñ charāġh-e-āḳhir-e-shab nahīñ ki na ḳhud bujhā to bujhā diyā

maiñ haqīqatoñ kā asiir huuñ hai tilism-e-ḳhvāb-o-ḳhayāl tū

tirī raushnī hai dhuāñ dhuāñ mirī tīrgī bhī diyā diyā

maiñ hī rabt-e-vahm-o-gumān huuñ tirī manziloñ kā nishān huuñ

koī sañg-e-rāh to huuñ nahīñ jise Thokaroñ se haTā diyā

mirī dāstāñ meñ ḳhushī-o-rañj ke moḌ bhī to ajiib the

kabhī qahqahoñ meñ bhī ashk the kabhī fart-e-ġham ne hañsā diyā

kabhi nazr-e-mashq-e-suKHan kiya kabhi aansuon mein baha diya

ki hamare sar gham-e-agahi ka jo qarz tha so chuka diya

main hun mah-e-waqt ka ham-nasab main tulu-e-sahar ka hun sabab

main charagh-e-aKHir-e-shab nahin ki na KHud bujha to bujha diya

main haqiqaton ka asir hun hai tilism-e-KHwab-o-KHayal tu

teri raushni hai dhuan dhuan meri tirgi bhi diya diya

main hi rabt-e-wahm-o-guman hun teri manzilon ka nishan hun

koi sang-e-rah to hun nahin jise Thokaron se haTa diya

meri dastan mein KHushi-o-ranj ke moD bhi to ajib the

kabhi qahqahon mein bhi ashk the kabhi fart-e-gham ne hansa diya