kabhi paDho to mujhe harf-e-motabar ki tarah

kabhī paḌho to mujhe harf-e-mo'tabar kī tarah

ye kyā ki paḌhte ho farsūda sī ḳhabar kī tarah

qalam to karte ho sar ko mire magar sun lo

maiñ reg-zār-e-vafā meñ huuñ ek shajar kī tarah

udāsī khol ke baal apnā so rahī hai yahāñ

ki jaise shahr meñ har ghar hai mere ghar kī tarah

hamāre zauq-e-parastish ko tum duā.eñ do

chamak rahe haiñ ye patthar jo ab guhar kī tarah

mashām-e-jāñ meñ abhī tak hai us badan kī baas

khilā thā raat jo ik ġhuncha-e-sahar kī tarah

har ek sañg pata pūchhtā hai ghar kā mire

nahīñ hai kyā koī sar aur mere sar kī tarah

navāh-e-jāñ meñ ujāloñ kā raqs hai 'shiblī'

ye kaun aayā dabe paañv yuuñ sahar kī tarah

kabhi paDho to mujhe harf-e-mo'tabar ki tarah

ye kya ki paDhte ho farsuda si KHabar ki tarah

qalam to karte ho sar ko mere magar sun lo

main reg-zar-e-wafa mein hun ek shajar ki tarah

udasi khol ke baal apna so rahi hai yahan

ki jaise shahr mein har ghar hai mere ghar ki tarah

hamare zauq-e-parastish ko tum duaen do

chamak rahe hain ye patthar jo ab guhar ki tarah

masham-e-jaan mein abhi tak hai us badan ki bas

khila tha raat jo ek ghuncha-e-sahar ki tarah

har ek sang pata puchhta hai ghar ka mere

nahin hai kya koi sar aur mere sar ki tarah

nawah-e-jaan mein ujalon ka raqs hai 'shibli'

ye kaun aaya dabe panw yun sahar ki tarah