kabhi parda-dar hun main raaz ka kabhi hun main parda-e-raaz mein

kabhī parda-dar huuñ maiñ raaz kā kabhī huuñ maiñ parda-e-rāz meñ

ki haqīqat ik mirī mushtarak hai haqīqat aur majāz meñ

ye kahāñ ke jalve samā ga.e ye kahāñ kī hairateñ chhā ga.iiñ

ki hazāroñ aa.ine lag ga.e haiñ nigāh-e-ā.ina-sāz meñ

kabhī tū bhī tālib-e-rahm ho kabhī tū bhī ġhair pe jaan de

kabhī jalva-gar ho ḳhudā kare tirā naaz mere niyāz meñ

kabhī ye bhī dekhte dekhte mirī aañkh se na Tapak paḌe

ki gudāz ālam-e-ḳhūn-e-dil hai mire jigar ke gudāz meñ

na karūñ salām jo ka.aba ko na karūñ jo sajda to kyā karūñ

hai ḳhayāl-e-but mire sāmne maiñ khaḌā huā huuñ namāz meñ

tirī barq-e-jalva jalā chukī thī uThā ke parda-e-ruḳh magar

mirī be-ḳhudī ne chhupā liyā mujhe apne parda-e-rāz meñ

mirī shohrateñ mujhe khīñch lā.īñ fareb de ke vagarna maiñ

vo tilism-e-ālam-e-rāz huuñ ki rahā huuñ muddatoñ raaz meñ

kisī tarah ho to ga.ī sahar magar ab ye Dar hai lagā huā

mirī shām-e-ġham na sharīk ho kahīñ un kī zulf-e-darāz meñ

vo tilism-e-gumshudagī huuñ maiñ ki baqā hai apnī fanā mujhe

mirī ḳhāmushī hai navā-garī maiñ nihāñ huuñ parda-e-sāz meñ

kabhi parda-dar hun main raaz ka kabhi hun main parda-e-raaz mein

ki haqiqat ek meri mushtarak hai haqiqat aur majaz mein

ye kahan ke jalwe sama gae ye kahan ki hairaten chha gain

ki hazaron aaine lag gae hain nigah-e-aina-saz mein

kabhi tu bhi talib-e-rahm ho kabhi tu bhi ghair pe jaan de

kabhi jalwa-gar ho KHuda kare tera naz mere niyaz mein

kabhi ye bhi dekhte dekhte meri aankh se na Tapak paDe

ki gudaz aalam-e-KHun-e-dil hai mere jigar ke gudaz mein

na karun salam jo kaba ko na karun jo sajda to kya karun

hai KHayal-e-but mere samne main khaDa hua hun namaz mein

teri barq-e-jalwa jala chuki thi uTha ke parda-e-ruKH magar

meri be-KHudi ne chhupa liya mujhe apne parda-e-raaz mein

meri shohraten mujhe khinch lain fareb de ke wagarna main

wo tilism-e-alam-e-raaz hun ki raha hun muddaton raaz mein

kisi tarah ho to gai sahar magar ab ye Dar hai laga hua

meri sham-e-gham na sharik ho kahin un ki zulf-e-daraaz mein

wo tilism-e-gumshudagi hun main ki baqa hai apni fana mujhe

meri KHamushi hai nawa-gari main nihan hun parda-e-saz mein