kabhi phulon se bahlaya gaya hun

kabhī phūloñ se bahlāyā gayā huuñ

kabhī kāñToñ meñ uljhāyā gayā huuñ

tamanna hai unhīñ par jaan de duuñ

ki jin ke dar se uThvāyā gayā huuñ

mirī qismat meñ bachnā thā bachā maiñ

go har manzil pe bahkāyā gayā huuñ

maiñ ik āzād rūh-e-lā-makāñ thā

yahāñ kis vāste laayā gayā huuñ

mujhī par kyoñ hai ye ilzām-e-hastī

na maiñ samjhā na samjhāyā gayā huuñ

maiñ rotā thā ba-tarz-e-tifl-e-nādāñ

baḌī mushkil se bahlāyā gayā huuñ

yahī shāyad mohabbat kī sazā hai

pakaḌ kirdār par laayā gayā huuñ

ibādat kā maza lene kī ḳhātir

bahut murshid ke ghar aayā gayā huuñ

'azīz' un kī ināyat kī badaulat

kahāñ se maiñ kahāñ laayā gayā huuñ

kabhi phulon se bahlaya gaya hun

kabhi kanTon mein uljhaya gaya hun

tamanna hai unhin par jaan de dun

ki jin ke dar se uThwaya gaya hun

meri qismat mein bachna tha bacha main

go har manzil pe bahkaya gaya hun

main ek aazad ruh-e-la-makan tha

yahan kis waste laya gaya hun

mujhi par kyon hai ye ilzam-e-hasti

na main samjha na samjhaya gaya hun

main rota tha ba-tarz-e-tifl-e-nadan

baDi mushkil se bahlaya gaya hun

yahi shayad mohabbat ki saza hai

pakaD kirdar par laya gaya hun

ibaadat ka maza lene ki KHatir

bahut murshid ke ghar aaya gaya hun

'aziz' un ki inayat ki badaulat

kahan se main kahan laya gaya hun