kabhi pyara koi manzar lagega

kabhī pyārā koī manzar lagegā

badalne meñ use dam bhar lagegā

nahīñ ho tum to ghar jañgal lage hai

jo tum ho saath jañgal ghar lagegā

abhī hai raat baaqī vahshatoñ kī

abhī jāoge ghar to Dar lagegā

kabhī patthar paḌeñge sar ke uupar

kabhī patthar ke uupar sar lagegā

dar o dīvār ke badleñge chehre

ḳhud apnā ghar parāyā ghar lagegā

chaleñge paañv us kūche kī jānib

magar ilzām sab dil par lagegā

ham apne dil kī bābat kyā batā.eñ

kabhī masjid kabhī mandar lagegā

agar tum mārne vāloñ meñ hoge

tumhārā phuul bhī patthar lagegā

kahāñ le kar chaloge sach kā parcham

muqābil jhuuT kā lashkar lagegā

halākū aaj kā baġhdād dekhe

to us kī ruuh ko bhī Dar lagegā

zamīñ ko aur ūñchā mat uThāo

zamīñ kā āsmāñ se sar lagegā

jo achchhe kaam hoñge un se hoñge

burā har kaam apne sar lagegā

sajāte ho badan bekār 'jāved'

tamāshā ruuh ke andar lagegā

kabhi pyara koi manzar lagega

badalne mein use dam bhar lagega

nahin ho tum to ghar jangal lage hai

jo tum ho sath jangal ghar lagega

abhi hai raat baqi wahshaton ki

abhi jaoge ghar to Dar lagega

kabhi patthar paDenge sar ke upar

kabhi patthar ke upar sar lagega

dar o diwar ke badlenge chehre

KHud apna ghar paraya ghar lagega

chalenge panw us kuche ki jaanib

magar ilzam sab dil par lagega

hum apne dil ki babat kya bataen

kabhi masjid kabhi mandar lagega

agar tum marne walon mein hoge

tumhaara phul bhi patthar lagega

kahan le kar chaloge sach ka parcham

muqabil jhuT ka lashkar lagega

halaku aaj ka baghdad dekhe

to us ki ruh ko bhi Dar lagega

zamin ko aur uncha mat uThao

zamin ka aasman se sar lagega

jo achchhe kaam honge un se honge

bura har kaam apne sar lagega

sajate ho badan bekar 'jawed'

tamasha ruh ke andar lagega