kabhi qalam kabhi nezon pe sar uchhalte hain

kabhī qalam kabhī nezoñ pe sar uchhalte haiñ

ab is fasīl se sūraj kahāñ nikalte haiñ

gharoñ se be-sabab apne kahāñ nikalte haiñ

zarūratoñ ke ishāroñ pe log chalte haiñ

añdherā un ke gharoñ kā bahut bhayānak hai

tamām shahr meñ jin ke charāġh jalte haiñ

havā ke jhoñke haiñ tere payāmbar lekin

havā ke jhoñke hī chehroñ pe ḳhaak malte haiñ

badal bhī jaa.e agar vo to ham na badleñge

nazar ke saath nazāre kahāñ badalte haiñ

vahāñ ke sar-phire dariyāoñ kā ḳhudā-hāfiz

pahāḌ aag bahut kam jahāñ ugalte haiñ

usī ke naġhmoñ se jhūmegī kā.enāt ai 'yād'

vo jis ke sāmne āhan-sifat pighalte haiñ

kabhi qalam kabhi nezon pe sar uchhalte hain

ab is fasil se suraj kahan nikalte hain

gharon se be-sabab apne kahan nikalte hain

zaruraton ke ishaaron pe log chalte hain

andhera un ke gharon ka bahut bhayanak hai

tamam shahr mein jin ke charagh jalte hain

hawa ke jhonke hain tere payambar lekin

hawa ke jhonke hi chehron pe KHak malte hain

badal bhi jae agar wo to hum na badlenge

nazar ke sath nazare kahan badalte hain

wahan ke sar-phire dariyaon ka KHuda-hafiz

pahaD aag bahut kam jahan ugalte hain

usi ke naghmon se jhumegi kaenat ai 'yaad'

wo jis ke samne aahan-sifat pighalte hain