kabhi sab chhin leta hun kabhi neamat luTata hun

kabhī sab chhīn letā huuñ kabhī ne.amat luTātā huuñ

mujhe sab vaqt kahte haiñ maiñ uñglī par nachātā huuñ

na maiñ ka.abe meñ rahtā huuñ na maiñ kāshī meñ rahtā huuñ

garebāñ jhāñk kar dekho maiñ tere dil meñ basta huuñ

akelā chhoḌ kar mujh ko yakāyak chal diye saare

sahārā jab ḳhudā kā hai kahegā kaun tanhā huuñ

garajtī hai ghaTā to kyā hai tūfānī havā to kyā

jigar meñ hai bahut himmat kisī se maiñ na Dartā huuñ

bichhaḌ jā.ūñ agar tum se añdherā chhā hī jā.egā

ki jis meñ nuur hai pinhā maiñ aisā ik nagīna huuñ

qasam khā kar mukar jaanā tirī aadat purānī hai

qasam se jab qasam khā.ūñ maiñ shiddat se nibhātā huuñ

ye sūraj chāñd kī yaarī baḌī adbhut pahelī hai

kaheñ donoñ hī aapas meñ ki tum aao maiñ jaatā huuñ

kabhi sab chhin leta hun kabhi neamat luTata hun

mujhe sab waqt kahte hain main ungli par nachata hun

na main kabe mein rahta hun na main kashi mein rahta hun

gareban jhank kar dekho main tere dil mein basta hun

akela chhoD kar mujh ko yakayak chal diye sare

sahaara jab KHuda ka hai kahega kaun tanha hun

garajti hai ghaTa to kya hai tufani hawa to kya

jigar mein hai bahut himmat kisi se main na Darta hun

bichhaD jaun agar tum se andhera chha hi jaega

ki jis mein nur hai pinha main aisa ek nagina hun

qasam kha kar mukar jaana teri aadat purani hai

qasam se jab qasam khaun main shiddat se nibhata hun

ye suraj chand ki yari baDi adbhut paheli hai

kahen donon hi aapas mein ki tum aao main jata hun