kabhi sadiyon ko lamha marta hai

kabhī sadiyoñ ko lamha mārtā hai

kabhī dariyā ko qatra mārtā hai

kahīñ par ek ko majme ne maarā

kahīñ majme ko tanhā mārtā hai

maiñ ye fahm-o-farāsat bech to duuñ

mujhe dil kā kaTahrā mārtā hai

havāle jab se tere dil kiyā hai

use terā havāla mārtā hai

tujhe ghar se bhagā saktā huuñ tere

magar bahnoñ kā chehra mārtā hai

mohabbat se mirī tum jaan le lo

mujhe bas sard lahja mārtā hai

adū kāñpe hai merā naam sun kar

mujhe merā masīhā mārtā hai

maiñ jis par farz kī takmīl kar duuñ

vo mere haq pe Daaka mārtā hai

mire mālik tirā banda nahīñ kyā

vo jo mazdūr bachcha mārtā hai

kabhi sadiyon ko lamha marta hai

kabhi dariya ko qatra marta hai

kahin par ek ko majme ne mara

kahin majme ko tanha marta hai

main ye fahm-o-farasat bech to dun

mujhe dil ka kaTahra marta hai

hawale jab se tere dil kiya hai

use tera hawala marta hai

tujhe ghar se bhaga sakta hun tere

magar bahnon ka chehra marta hai

mohabbat se meri tum jaan le lo

mujhe bas sard lahja marta hai

adu kanpe hai mera nam sun kar

mujhe mera masiha marta hai

main jis par farz ki takmil kar dun

wo mere haq pe Daka marta hai

mere malik tera banda nahin kya

wo jo mazdur bachcha marta hai