kabhi sahar se kabhi tirgi se shikwa hai

kabhī sahar se kabhī tīrgī se shikva hai

kabhī ḳhudā se kabhī aadmī se shikva hai

ḳhud apnī zaat se jo āshnā nahīñ us ko

bas ek apne sivā har kisī se shikva hai

majāzī ishq kisī ko sukūñ nahīñ detā

jise bhī dekho use dil-lagī se shikva hai

vafā is ahd-e-jafā meñ hai ik fareb-e-nazar

bisāt-e-vaqt kī jādūgarī se shikva hai

kare jo khul ke adāvat nahīñ hai us se gila

munāfiqat se bharī dostī se shikva hai

sukūn-e-dil to milā hai nashāt-e-zīst nahīñ

qalandaroñ kā yahī āgahī se shikva hai

koī amal nahīñ aisā ḳhudā ko pesh karūñ

'sabā' mujhe mirī is bandagī se shikva hai

kabhi sahar se kabhi tirgi se shikwa hai

kabhi KHuda se kabhi aadmi se shikwa hai

KHud apni zat se jo aashna nahin us ko

bas ek apne siwa har kisi se shikwa hai

majazi ishq kisi ko sukun nahin deta

jise bhi dekho use dil-lagi se shikwa hai

wafa is ahd-e-jafa mein hai ek fareb-e-nazar

bisat-e-waqt ki jadugari se shikwa hai

kare jo khul ke adawat nahin hai us se gila

munafiqat se bhari dosti se shikwa hai

sukun-e-dil to mila hai nashat-e-zist nahin

qalandaron ka yahi aagahi se shikwa hai

koi amal nahin aisa KHuda ko pesh karun

'saba' mujhe meri is bandagi se shikwa hai