kabhi sahar to kabhi sham hona chahta hun

kabhī sahar to kabhī shaam honā chāhtā huuñ

kabhī piyāla kabhī jaam honā chāhtā huuñ

nahīñ mile the to shohrat kī bhuuk jaagī thī

jo mil ga.e ho to gumnām honā chāhtā huuñ

ubhar rahe haiñ tirī chāhatoñ ke bāġh-o-bahār

maiñ chupke chupke dil-ārām honā chāhtā huuñ

sunahrī yādeñ hī paltī rahīñ jis āñgan meñ

maiñ us mahal ke dar-o-bām honā chāhtā huuñ

maiñ apne ḳhud ke banā.e hue usūloñ meñ

kabhī maiñ kirshn kabhī raam honā chāhtā huuñ

tere fasāne kī har ḳhushnumā ibārat meñ

kahīñ pe qaaf kahīñ laam honā chāhtā huuñ

mire ḳhudā mujhe ab husn kī bashārat de

maiñ us ke shahr pe ilhām honā chāhtā huuñ

udāsiyoñ ne likhā hai jo chehre chehre pe

fasurdagī kā vo paiġhām honā chāhtā huuñ

qadam qadam pe yahāñ karbalā.eñ phailī haiñ

maiñ vaqt-e-asr kā hañgām honā chāhtā huuñ

kabhi sahar to kabhi sham hona chahta hun

kabhi piyala kabhi jam hona chahta hun

nahin mile the to shohrat ki bhuk jagi thi

jo mil gae ho to gumnam hona chahta hun

ubhar rahe hain teri chahaton ke bagh-o-bahaar

main chupke chupke dil-aram hona chahta hun

sunahri yaaden hi palti rahin jis aangan mein

main us mahal ke dar-o-baam hona chahta hun

main apne KHud ke banae hue usulon mein

kabhi main kirshn kabhi ram hona chahta hun

tere fasane ki har KHushnuma ibarat mein

kahin pe qaf kahin lam hona chahta hun

mere KHuda mujhe ab husn ki bashaarat de

main us ke shahr pe ilham hona chahta hun

udasiyon ne likha hai jo chehre chehre pe

fasurdagi ka wo paigham hona chahta hun

qadam qadam pe yahan karbalaen phaili hain

main waqt-e-asr ka hangam hona chahta hun