کبھی صحرا کبھی گلزار بھی ہے

کبھی صحرا کبھی گلزار بھی ہے

محبت کیف بھی آزار بھی ہے

میری پلکوں سے آنسو چن کے دیکھو

ہر اک آنسو میں نوک خار بھی ہے

چلے جب راہ حق پر سوچنا کیا

شجر یاں کوئی سایہ دار بھی ہے

یہاں یوسف بکے ہیں کوڑیوں میں

یہ دنیا مصر کا بازار بھی ہے

صبا ہم راز گل ہوتی ہے لیکن

تعلق باعث آزار بھی ہے

کہو حق بات منڈیلا کی مانند

اگر کچھ جرأت اظہار بھی ہے

وفا کے نام پر دکھ سہنے والو

جدائی مرہم آزار بھی ہے

تھی اس کی آنکھ پر نم وقت رخصت

دل رنجور اب سرشار بھی ہے