kabhi sar-ba-sajda hua tha dil kabhi har qadam pe qiyam tha

kabhī sar-ba-sajda huā thā dil kabhī har qadam pe qiyām thā

ki vo rāsta tire shahr kā sabhī rāstoñ kā imaam thā

kabhī dard-e-tūl-e-firāq thā kabhī dukh ki vasl hai muḳhtasar

rah-e-ishq meñ to sukūn kā koī ek pal bhī harām thā

jise ḳhud-sarī kā ġhurūr thā jo ḳhud-āgahī kā zuhūr thā

vahī dil gadā-e-rah-e-talab tirī ik nazar kā ġhulām thā

na to ham-safar se umiid thī na hī rāhbar pe yaqīñ thā

tire shahr ke sabhī rāstoñ kā ajiib sā hī nizām thā

isī justujū meñ sadā rahā ki tirī talab ko faroġh ho

mirī ḳhvāhishoñ meñ chhupā huā tirī aarzū kā davām thā

mujhe kun kahā to maiñ ho gayā faya-kun meñ'' hī kamāl thā

maiñ asīr-e-ahd-e-alast huuñ ki balā mirā hī kalām thā

tire naam se jo alag huā to banā 'hidāyat'-e-be-navā

ki azal ke shahr-e-vujūd meñ tirā naam hī mirā naam thā

kabhi sar-ba-sajda hua tha dil kabhi har qadam pe qiyam tha

ki wo rasta tere shahr ka sabhi raston ka imam tha

kabhi dard-e-tul-e-firaq tha kabhi dukh ki wasl hai muKHtasar

rah-e-ishq mein to sukun ka koi ek pal bhi haram tha

jise KHud-sari ka ghurur tha jo KHud-agahi ka zuhur tha

wahi dil gada-e-rah-e-talab teri ek nazar ka ghulam tha

na to ham-safar se umid thi na hi rahbar pe yaqin tha

tere shahr ke sabhi raston ka ajib sa hi nizam tha

isi justuju mein sada raha ki teri talab ko farogh ho

meri KHwahishon mein chhupa hua teri aarzu ka dawam tha

mujhe kun kaha to main ho gaya faya-kun mein hi kamal tha

main asir-e-ahd-e-alast hun ki bala mera hi kalam tha

tere nam se jo alag hua to bana 'hidayat'-e-be-nawa

ki azal ke shahr-e-wujud mein tera nam hi mera nam tha