kabhi sitare kabhi kahkashan bulata hai

kabhī sitāre kabhī kahkashāñ bulātā hai

hameñ vo bazm meñ apnī kahāñ bulātā hai

na jaane kaun sī uftād aa paḌī hai ki jo

ham ahl-e-'ishq ko kār-e-jahāñ bulātā hai

ye kaisā dām-e-rihā.ī bichhā diyā us ne

zamīñ pakaḌtī hai aur āsmāñ bulātā hai

galī galī meñ 'aqīdoñ bharī dukāneñ haiñ

qadam qadam pe nayā āstāñ bulātā hai

bhaTak ga.e haiñ magar gum nahīñ hue haiñ kahīñ

abhī hameñ jaras-e-kārvāñ bulātā hai

ye aag lagne se pahle kī bāz-gasht hai jo

bujhāne vāloñ ko ab tak dhuāñ bulātā hai

umiid TūTne lagtī hai jab bhī koī 'salīm'

to ik yaqīñ pas-e-vahm-o-gumāñ bulātā hai

kabhi sitare kabhi kahkashan bulata hai

hamein wo bazm mein apni kahan bulata hai

na jaane kaun si uftad aa paDi hai ki jo

hum ahl-e-'ishq ko kar-e-jahan bulata hai

ye kaisa dam-e-rihai bichha diya us ne

zamin pakaDti hai aur aasman bulata hai

gali gali mein 'aqidon bhari dukanen hain

qadam qadam pe naya aastan bulata hai

bhaTak gae hain magar gum nahin hue hain kahin

abhi hamein jaras-e-karwan bulata hai

ye aag lagne se pahle ki baz-gasht hai jo

bujhane walon ko ab tak dhuan bulata hai

umid TuTne lagti hai jab bhi koi 'salim'

to ek yaqin pas-e-wahm-o-guman bulata hai