kabhi sukun kabhi sabr-o-qarar TuTega

kabhī sukūñ kabhī sabr-o-qarār TūTegā

agar ye dil hai to phir baar baar TūTegā

vo apne zarf se baḌh kar bharā huā bādal

ye dekhnā kahīñ be-iḳhtiyār TūTegā

vo ek pal bhī kisī roz aa hī jā.egā

ki jab ye zindagī par e'tibār TūTegā

vagarna chaltā rahegā ye silsila yuuñ hī

maiñ TuuT jā.ūñ tabhī intishār TūTegā

phir ek baar ġhalat niklā ye qayās mirā

girā chaTān pe to ābshār TūTegā

tire zavāl kī manzil abhī nahīñ aa.ī

nasha to TuuT chukā ab ḳhumār TūTegā

isī ḳhayāl se shāyad Darā huā hai saaz

agar ye raag na TuuTā to taar TūTegā

koī udaas sā naġhma hī gungunā.eñ ham

tabhī tilsim-e-shab-e-intizār TūTegā

kabhi sukun kabhi sabr-o-qarar TuTega

agar ye dil hai to phir bar bar TuTega

wo apne zarf se baDh kar bhara hua baadal

ye dekhna kahin be-iKHtiyar TuTega

wo ek pal bhi kisi roz aa hi jaega

ki jab ye zindagi par e'tibar TuTega

wagarna chalta rahega ye silsila yun hi

main TuT jaun tabhi intishaar TuTega

phir ek bar ghalat nikla ye qayas mera

gira chaTan pe to aabshaar TuTega

tere zawal ki manzil abhi nahin aai

nasha to TuT chuka ab KHumar TuTega

isi KHayal se shayad Dara hua hai saz

agar ye rag na TuTa to tar TuTega

koi udas sa naghma hi gungunaen hum

tabhi tilsim-e-shab-e-intizar TuTega