kabhi su-e-dasht nikal paDe kabhi su-e-dar chale gae

kabhī sū-e-dasht nikal paḌe kabhī sū-e-dār chale ga.e

tirī chaah meñ na kahāñ kahāñ tire be-qarār chale ga.e

jo kitāb-e-dil meñ thī pankhuḌī kisī sar-kashīda gulāb kī

vo dabī rahī to varaq varaq hue lāla-zār chale ga.e

unheñ kaam thā tire kaam se tire zikr se tire naam se

vo jo ābla-pā barahna-pā sar-e-dasht-e-ḳhār chale ga.e

na vo dhaḌkaneñ na vo uljhaneñ na vo vasvase na vo qahqahe

tire ahd meñ dil-e-zār ke sabhī iḳhtiyār chale ga.e

mire pairahan kī gavāhiyāñ na sunī ga.iiñ na likhī ga.iiñ

ki zanān-e-misr kī baat par hī azīzdār chale ga.e

na vo rasm-e-jāma-darī rahī na mizāj-e-baḳhiya-garī rahā

vo junūñ-shi.ār kahāñ rahe vo karam-nisār chale ga.e

jo na dair meñ na haram meñ the jo asiir halqa-e-ġham meñ the

vo navā-e-dard pe naġhma-ḳhvāñ tire shab-guzār chale ga.e

maiñ sukūt-e-dāman-e-dasht se jahāñ guftugū meñ magan rahā

vahāñ jhiil thak ke rukī rahī magar ābshār chale ga.e

tirā dard 'bazmī'-e-nā-tavāñ na idhar sunā na udhar sunā

ki dayār-e-nik.hat-o-nūr se tire ġham-gusār chale ga.e

kabhi su-e-dasht nikal paDe kabhi su-e-dar chale gae

teri chah mein na kahan kahan tere be-qarar chale gae

jo kitab-e-dil mein thi pankhuDi kisi sar-kashida gulab ki

wo dabi rahi to waraq waraq hue lala-zar chale gae

unhen kaam tha tere kaam se tere zikr se tere nam se

wo jo aabla-pa barahna-pa sar-e-dasht-e-KHar chale gae

na wo dhaDkanen na wo uljhanen na wo waswase na wo qahqahe

tere ahd mein dil-e-zar ke sabhi iKHtiyar chale gae

mere pairahan ki gawahiyan na suni gain na likhi gain

ki zanan-e-misr ki baat par hi azizdar chale gae

na wo rasm-e-jama-dari rahi na mizaj-e-baKHiya-gari raha

wo junun-shiar kahan rahe wo karam-nisar chale gae

jo na dair mein na haram mein the jo asir halqa-e-gham mein the

wo nawa-e-dard pe naghma-KHwan tere shab-guzar chale gae

main sukut-e-daman-e-dasht se jahan guftugu mein magan raha

wahan jhil thak ke ruki rahi magar aabshaar chale gae

tera dard 'bazmi'-e-na-tawan na idhar suna na udhar suna

ki dayar-e-nikhat-o-nur se tere gham-gusar chale gae