kabhi sujhi na tark-e-KHud-numai ki sitaron ko

kabhī sūjhī na tark-e-ḳhud-numā.ī kī sitāroñ ko

ḳhudā ne ye sa.ādat baḳhsh dī ham ḳhāksāroñ ko

baḌoñ kī dostī se faiz kyā hai ḳhāksāroñ ko

miTā detā hai dariyā josh-e-tūfāñ meñ kināroñ ko

ḳhudā ke fazl se mahshar meñ bhī vo surḳh-rū hoñge

janāb-e-shaiḳh kyā samjhe hue haiñ bāda-ḳhvāroñ ko

kisī ko ishq ke uqde kā hal ab tak nahīñ sūjhā

ye vo mushkil hai duniyā meñ jo pesh aa.ī hazāroñ ko

vahī nisbat hai ḳhūbān-e-jahāñ ko husn se tere

falak par jo mah-e-kāmil se hotī hai sitāroñ ko

hai is afsurdagī par bhī tabī.at meñ vo rañgīnī

mirī fasl-e-ḳhizāñ par rashk aatā hai bahāroñ ko

kisī ke ḳhair-maqdam se kabhī ġhāfil nahīñ hote

qadam lenā sikhāyā maiñ ne har sahrā ke ḳhāroñ ko

maqām apnā bhī 'sāhir' imtiyāzī shaan rakhtā hai

hamārī puḳhta-goī kī ḳhabar kyā ḳhām-kāroñ ko

kabhi sujhi na tark-e-KHud-numai ki sitaron ko

KHuda ne ye saadat baKHsh di hum KHaksaron ko

baDon ki dosti se faiz kya hai KHaksaron ko

miTa deta hai dariya josh-e-tufan mein kinaron ko

KHuda ke fazl se mahshar mein bhi wo surKH-ru honge

janab-e-shaiKH kya samjhe hue hain baada-KHwaron ko

kisi ko ishq ke uqde ka hal ab tak nahin sujha

ye wo mushkil hai duniya mein jo pesh aai hazaron ko

wahi nisbat hai KHuban-e-jahan ko husn se tere

falak par jo mah-e-kaamil se hoti hai sitaron ko

hai is afsurdagi par bhi tabiat mein wo rangini

meri fasl-e-KHizan par rashk aata hai bahaaron ko

kisi ke KHair-maqdam se kabhi ghafil nahin hote

qadam lena sikhaya main ne har sahra ke KHaron ko

maqam apna bhi 'sahir' imtiyazi shan rakhta hai

hamari puKHta-goi ki KHabar kya KHam-karon ko