kabhi surat nahin milti kabhi sirat nahin milti

kabhī sūrat nahīñ miltī kabhī sīrat nahīñ miltī

yahāñ insān se insān kī fitrat nahīñ miltī

nasība ne hī baḳhshā hai har ik ko us ke hisse kā

yahāñ ik baap ke beToñ kī bhī qismat nahīñ miltī

karam maulā kare to aadmī be-laus hotā hai

na ho us kī agar rahmat to ye tāqat nahīñ miltī

vo duniyā meñ bhī rahte haiñ to ho kar ḳhud se begāne

jinheñ apne gunāhoñ se kabhī fursat nahīñ miltī

asar ik sā hai ham donoñ pe vaa.iz us muī mai kā

vagarna terī merī ik bhī to aadat nahīñ miltī

kahāñ aadam nikaltā ḳhuld se itnā to socho tum

agar havvā kī jānib se use dāvat nahīñ miltī

jo tere dar pe ai maulā na 'āzim' yuuñ duā kartā

use jannat nahīñ miltī tujhe shohrat nahīñ miltī

kabhi surat nahin milti kabhi sirat nahin milti

yahan insan se insan ki fitrat nahin milti

nasiba ne hi baKHsha hai har ek ko us ke hisse ka

yahan ek bap ke beTon ki bhi qismat nahin milti

karam maula kare to aadmi be-laus hota hai

na ho us ki agar rahmat to ye taqat nahin milti

wo duniya mein bhi rahte hain to ho kar KHud se begane

jinhen apne gunahon se kabhi fursat nahin milti

asar ek sa hai hum donon pe waiz us mui mai ka

wagarna teri meri ek bhi to aadat nahin milti

kahan aadam nikalta KHuld se itna to socho tum

agar hawwa ki jaanib se use dawat nahin milti

jo tere dar pe ai maula na 'azim' yun dua karta

use jannat nahin milti tujhe shohrat nahin milti