kabhi tamir hoti hun kabhi mismar hoti hun

kabhī ta.amīr hotī huuñ kabhī mismār hotī huuñ

kabhī āsān lagtī huuñ kabhī dushvār hotī huuñ

mire har ruup meñ hī dilkashī qudrat ne rakhī hai

kabhī ḳhushbū ke haale meñ gul-e-gulzār hotī huuñ

kabhī mahfil meñ roz-o-shab hue haiñ tazkire mere

kabhī ban kar ḳhabar maiñ zīnat-e-aḳhbār hotī huuñ

kabhī mere ishāroñ par badal jaatī haiñ tadbīreñ

kabhī tāqat ke aivānoñ kā ik hathiyār hotī huuñ

mirī to umr guzrī hai yūñhī girdāb se laḌte

kabhī kashtī bachāne ke liye patvār hotī huuñ

kabhī maiñ apnī sochoñ meñ magan rahtī huuñ roz-o-shab

kabhī maiñ apne dilbar ke liye ġham-ḳhvār hotī huuñ

'iram' sun kar jise is zindagī par pyaar aatā hai

usī āvāz par maiñ roz hī bedār hotī huuñ

kabhi tamir hoti hun kabhi mismar hoti hun

kabhi aasan lagti hun kabhi dushwar hoti hun

mere har rup mein hi dilkashi qudrat ne rakhi hai

kabhi KHushbu ke haale mein gul-e-gulzar hoti hun

kabhi mahfil mein roz-o-shab hue hain tazkire mere

kabhi ban kar KHabar main zinat-e-aKHbar hoti hun

kabhi mere ishaaron par badal jati hain tadbiren

kabhi taqat ke aiwanon ka ek hathiyar hoti hun

meri to umr guzri hai yunhi girdab se laDte

kabhi kashti bachane ke liye patwar hoti hun

kabhi main apni sochon mein magan rahti hun roz-o-shab

kabhi main apne dilbar ke liye gham-KHwar hoti hun

'iram' sun kar jise is zindagi par pyar aata hai

usi aawaz par main roz hi bedar hoti hun