kabhi tartib deta hai kabhi mismar karta hai

kabhī tartīb detā hai kabhī mismār kartā hai

vo apnī bebasī kā is tarah iz.hār kartā hai

gumān-o-be-yaqīnī kab kise takmīl karte haiñ

jise ummīd hotī hai vahī isrār kartā hai

kisī ik faisle ke muntazir haiñ log muddat se

use kāfir kaheñge sab agar inkār kartā hai

paḌāv kar chukā hai kārvāñ aise ilāqe meñ

jahāñ na Thaharne pe kul jahāñ isrār kartā hai

kabhī to rāste ḳhud manziloñ se duur karte haiñ

kahīñ par ḳhud junūñ bhī rāsta hamvār kartā hai

mujhe mere irāde TūTne se rokte haiñ 'nāz'

magar hālāt kahte haiñ safar be-kār kartā hai

kabhi tartib deta hai kabhi mismar karta hai

wo apni bebasi ka is tarah izhaar karta hai

guman-o-be-yaqini kab kise takmil karte hain

jise ummid hoti hai wahi israr karta hai

kisi ek faisle ke muntazir hain log muddat se

use kafir kahenge sab agar inkar karta hai

paDaw kar chuka hai karwan aise ilaqe mein

jahan na Thaharne pe kul jahan israr karta hai

kabhi to raste KHud manzilon se dur karte hain

kahin par KHud junun bhi rasta hamwar karta hai

mujhe mere irade TuTne se rokte hain 'naz'

magar haalat kahte hain safar be-kar karta hai