kabhi tere KHat ko jala diya kabhi nam likh ke miTa diya

kabhī tere ḳhat ko jalā diyā kabhī naam likh ke miTā diyā

ye mirī anā kā savāl thā tujhe yaad kar ke bhulā diyā

nayā aarzū kā mizāj hai na.e daur kī haiñ rifāqateñ

tirī qurbatoñ kā jo zaḳhm thā tirī dūriyoñ ne miTā diyā

mujhe hai ḳhabar tujhe ishq thā faqat apne aks-e-jamāl se

ki maiñ gum huuñ tere vajūd meñ mujhe ā.īna sā banā diyā

maiñ hisār meñ tū hisār meñ isī silsile ko davām hai

kabhī maslahat ne judā kiyā to kabhī ġharaz ne milā diyā

sabhī kah rahe haiñ ye barmalā jo guzar gayā vahī ḳhuub thā

abhī ek pal jo hai aasrā use sab ne yūñhī gañvā diyā

vo sharar ho yā ki charāġh ho hai tapish mizāj meñ ai 'hijāb'

kabhī har nafas ko jalā diyā kabhī raushnī ko baḌhā diyā

kabhi tere KHat ko jala diya kabhi nam likh ke miTa diya

ye meri ana ka sawal tha tujhe yaad kar ke bhula diya

naya aarzu ka mizaj hai nae daur ki hain rifaqaten

teri qurbaton ka jo zaKHm tha teri duriyon ne miTa diya

mujhe hai KHabar tujhe ishq tha faqat apne aks-e-jamal se

ki main gum hun tere wajud mein mujhe aaina sa bana diya

main hisar mein tu hisar mein isi silsile ko dawam hai

kabhi maslahat ne juda kiya to kabhi gharaz ne mila diya

sabhi kah rahe hain ye barmala jo guzar gaya wahi KHub tha

abhi ek pal jo hai aasra use sab ne yunhi ganwa diya

wo sharar ho ya ki charagh ho hai tapish mizaj mein ai 'hijab'

kabhi har nafas ko jala diya kabhi raushni ko baDha diya