kabhi tha ‘naqwi’-e-bekas bhi ek gulistan sa

kabhī thā ‘naqvī’-e-bekas bhī ik gulistāñ sā

magar jo dekhiye ab to huā bayābāñ sā

junūn-e-ishq hai pariyāñ uḌaa.e phirtī haiñ

dayār-e-shauq meñ āshiq bhī hai sulaimāñ sā

tumhārī tez nazar se khile diloñ ke chaman

tamām ālam-e-imkāñ huā namak-dāñ sā

qafas kā dar jo khulā bāzuoñ meñ zor nahīñ

qafas-nasīboñ pe chhāyā hai ab bhī zindāñ sā

bahār vo hai kalī dil kī jis se ho ḳhandāñ

huā kare jo ye aalam hai ik bahārāñ sā

tumheñ ḳhabar hai ki dil par kisī ke kyā guzrī

ba-rang-e-ā.ina sākit hai aur hairāñ sā

jo dekhe daaġh mire dil ke rah ga.e shashdar

samajh rahe the ki bas hogā ik charāġhāñ sā

ḳhabar uḌī ki vo guzreñge mere kūche se

tamām raah kā aalam thā nargisistāñ sā

kabhi tha ‘naqwi’-e-bekas bhi ek gulistan sa

magar jo dekhiye ab to hua bayaban sa

junun-e-ishq hai pariyan uDae phirti hain

dayar-e-shauq mein aashiq bhi hai sulaiman sa

tumhaari tez nazar se khile dilon ke chaman

tamam aalam-e-imkan hua namak-dan sa

qafas ka dar jo khula bazuon mein zor nahin

qafas-nasibon pe chhaya hai ab bhi zindan sa

bahaar wo hai kali dil ki jis se ho KHandan

hua kare jo ye aalam hai ek bahaaran sa

tumhein KHabar hai ki dil par kisi ke kya guzri

ba-rang-e-aina sakit hai aur hairan sa

jo dekhe dagh mere dil ke rah gae shashdar

samajh rahe the ki bas hoga ek charaghan sa

KHabar uDi ki wo guzrenge mere kuche se

tamam rah ka aalam tha nargisistan sa