کبھی تھے ہم سفر راہ محبت میں خدا اور ہم

کبھی تھے ہم سفر راہ محبت میں خدا اور ہم

خدا اب آسماں پر ہے زمیں پر ہیں ہوا اور ہم

غزل اس نے مکمل ہی نہ ہونے دی کہ مدت سے

بس اک شعر اور اس کے نام کا اک قافیہ اور ہم

اب اتنی شرم ہے تجھ کو جو کھل کر بات کرنے سے

کریں گے رات بھر باتیں ترے بند قبا اور ہم

محبت چھوڑ کر تم جاؤ دنیا کے مزے لوٹو

سمجھ لیں گے بس آپس میں محبت کی بلا اور ہم

وہی زخمی بدن ہے اور وہی ٹوٹا ہوا دل ہے

وہی اس کی گلی اور عاشقی کی ابتدا اور ہم

اسے رونق دکھائیں ہم بھی اپنی بے وفائی کی

کسی محفل میں مل جائیں اگر وہ بے وفا اور ہم

سب اپنے روبرو ہیں گفتگو کرتا نہیں کوئی

تمہارا آئنہ اور تم ہمارا آئنہ اور ہم

ہمارے مے کدے میں آخر شب کا سماں دیکھو

نماز فجر ہے اور ہیں نشے میں دھت خدا اور ہم