kabhi the ham-safar rah-e-mohabbat mein KHuda aur hum

kabhī the ham-safar rāh-e-mohabbat meñ ḳhudā aur ham

ḳhudā ab āsmāñ par hai zamīñ par haiñ havā aur ham

ġhazal us ne mukammal hī na hone dī ki muddat se

bas ik she'r aur us ke naam kā ik qāfiya aur ham

ab itnī sharm hai tujh ko jo khul kar baat karne se

kareñge raat bhar bāteñ tire band-e-qabā aur ham

mohabbat chhoḌ kar tum jaao duniyā ke maze luuTo

samajh leñge bas aapas meñ mohabbat kī balā aur ham

vahī zaḳhmī badan hai aur vahī TuuTā huā dil hai

vahī us kī galī aur 'āshiqī kī ibtidā aur ham

use raunaq dikhā.eñ ham bhī apnī bevafā.ī kī

kisī mahfil meñ mil jaa.eñ agar vo bevafā aur ham

sab apne rū-barū haiñ guftugū kartā nahīñ koī

tumhārā aa.ina aur tum hamārā aa.ina aur ham

hamāre mai-kade meñ āḳhir-e-shab kā samāñ dekho

namāz-e-fajr hai aur haiñ nashe meñ dhut ḳhudā aur ham

kabhi the ham-safar rah-e-mohabbat mein KHuda aur hum

KHuda ab aasman par hai zamin par hain hawa aur hum

ghazal us ne mukammal hi na hone di ki muddat se

bas ek she'r aur us ke nam ka ek qafiya aur hum

ab itni sharm hai tujh ko jo khul kar baat karne se

karenge raat bhar baaten tere band-e-qaba aur hum

mohabbat chhoD kar tum jao duniya ke maze luTo

samajh lenge bas aapas mein mohabbat ki bala aur hum

wahi zaKHmi badan hai aur wahi TuTa hua dil hai

wahi us ki gali aur 'ashiqi ki ibtida aur hum

use raunaq dikhaen hum bhi apni bewafai ki

kisi mahfil mein mil jaen agar wo bewafa aur hum

sab apne ru-baru hain guftugu karta nahin koi

tumhaara aaina aur tum hamara aaina aur hum

hamare mai-kade mein aaKHir-e-shab ka saman dekho

namaz-e-fajr hai aur hain nashe mein dhut KHuda aur hum