kabhi to aa meri aankhon ki raushni ban kar

kabhī to aa mirī āñkhoñ kī raushnī ban kar

zamīn-e-ḳhushk ko sairāb kar namī ban kar

rachā huā hai tirī kam-nigāhiyoñ kā karam

nashe kī tarah mire dil meñ sarḳhushī ban kar

kabhī to aa tapish-e-jāñ-gusal hī dene ko

kabhī guzar inhī rāhoñ se ajnabī ban kar

ḳhushā ki aur milā ġham kā tāziyāna hameñ

ḳhushā vo dard jo chhāyā hai naġhmagī ban kar

tumheñ aziiz nahīñ hai to ho aziiz kise

na mil sakegā koī vajh-e-zindagī ban kar

palaT ke dekh na us ko vo ḳhaak kar degā

tire ġhurūr ko zahrāb kī anī ban kar

huī na us se vafā tum se kyā huā 'nāhīd'

abhī talak jiye jaatī ho bāolī ban kar

kabhi to aa meri aankhon ki raushni ban kar

zamin-e-KHushk ko sairab kar nami ban kar

racha hua hai teri kam-nigahiyon ka karam

nashe ki tarah mere dil mein sarKHushi ban kar

kabhi to aa tapish-e-jaan-gusal hi dene ko

kabhi guzar inhi rahon se ajnabi ban kar

KHusha ki aur mila gham ka taziyana hamein

KHusha wo dard jo chhaya hai naghmagi ban kar

tumhein aziz nahin hai to ho aziz kise

na mil sakega koi wajh-e-zindagi ban kar

palaT ke dekh na us ko wo KHak kar dega

tere ghurur ko zahrab ki ani ban kar

hui na us se wafa tum se kya hua 'nahid'

abhi talak jiye jati ho baoli ban kar