kabhi to dast-e-hama-gir mein subu ho jae

kabhī to dast-e-hama-gīr meñ subū ho jaa.e

ye ḳhaak bhī kabhī āsūda-e-numū ho jaa.e

bayāz-e-dil pe tirā naqsh āshkārā ho

phir is ke baa'd tirī diid kū-ba-kū ho jaa.e

nahīñ ki rang-e-hinā mere haath par na khilā

hatheliyoñ ko ye zid thī ki dil lahū ho jaa.e

vo aur haiñ ki jo sāmān-e-zīst māñgte haiñ

pe is qadar ho ki sāmān-e-ābrū ho jaa.e

ye izn roz-e-azal ishq ko diyā na gayā

ki mubtalā-e-havas koī aarzū ho jaa.e

vo fitna-gar ki kabhī kheñch le badan se lahū

kabhī vo chashm-e-siyahkār aabjū ho jaa.e

bahāl ho jo takallum kā silsila to 'abīr'

tire nasīb pe shāyad ki guftugū ho jaa.e

kabhi to dast-e-hama-gir mein subu ho jae

ye KHak bhi kabhi aasuda-e-numu ho jae

bayaz-e-dil pe tera naqsh aashkara ho

phir is ke ba'd teri did ku-ba-ku ho jae

nahin ki rang-e-hina mere hath par na khila

hatheliyon ko ye zid thi ki dil lahu ho jae

wo aur hain ki jo saman-e-zist mangte hain

pe is qadar ho ki saman-e-abru ho jae

ye izn roz-e-azal ishq ko diya na gaya

ki mubtala-e-hawas koi aarzu ho jae

wo fitna-gar ki kabhi khench le badan se lahu

kabhi wo chashm-e-siyahkar aabju ho jae

bahaal ho jo takallum ka silsila to 'abir'

tere nasib pe shayad ki guftugu ho jae