kabhi to dekhe hamari araq-fishani dhup

kabhī to dekhe hamārī araq-fishānī dhuup

jale bhavoñ pe kare apnī mehrbānī dhuup

hamāre daaġh ko jab āftāb ne dekhā

huā ye zard nazar aa.e za.afrānī dhuup

tap-e-firāq vo bad hai chaḌhe jo sūraj ko

pighal ke barf kī sūrat ho paanī paanī dhuup

safar saqar hai hazāroñ balā.eñ sar par haiñ

hai ek un meñ se āseb-e-āsmānī dhuup

tah-e-sahāb rahe āftāb-e-roz-e-firāq

shuāoñ se na kare mujh pe teġh-rānī dhuup

kaTe jo raat bhī zaḳhmī-e-hijr ko to kyā

hai maar Dālne ko chāñdnī kī saanī dhuup

rahe shagufta ham is tarah jaise aag ke phuul

kabhī na dasht-navardī meñ ham ne paanī dhuup

safed baal hue jaise tevar aate haiñ

bahut za.iif ko dete hai sargirānī dhuup

hameñ to fasl-e-zamistāñ bahut ḳhush aatī hai

vo ThanDī ThanDī havā aur vo suhānī dhuup

lagā.e abr kā lukkā na kis tarah chhatrī

kare na chāñd se rañgat ko āsmānī dhuup

ajab nahīñ gul-e-ruḳhsār sausanī ho jaa.eñ

bahār-e-husn ko hai āfat-e-ḳhizānī dhuup

amiir shāl-doshāloñ meñ garm rāhat-o-aish

ġharīb ke liye jāḌoñ meñ zindagānī dhuup

zarā sī garm havā meñ ye muñh banātī haiñ

na kar sakegī guloñ kī mizāj-dānī dhuup

muvāfaqat na kabhī sard-o-garm meñ hogī

hai chāñdnī mirī piirī tirī javānī dhuup

shabāb yaad dilāte hai sar-safedī-e-'bahr'

hai āftāb-e-javānī kī ye nishānī dhuup

kabhi to dekhe hamari araq-fishani dhup

jale bhawon pe kare apni mehrbani dhup

hamare dagh ko jab aaftab ne dekha

hua ye zard nazar aae zafrani dhup

tap-e-firaq wo bad hai chaDhe jo suraj ko

pighal ke barf ki surat ho pani pani dhup

safar saqar hai hazaron balaen sar par hain

hai ek un mein se aaseb-e-asmani dhup

tah-e-sahab rahe aaftab-e-roz-e-firaq

shuaon se na kare mujh pe tegh-rani dhup

kaTe jo raat bhi zaKHmi-e-hijr ko to kya

hai mar Dalne ko chandni ki sani dhup

rahe shagufta hum is tarah jaise aag ke phul

kabhi na dasht-nawardi mein hum ne pani dhup

safed baal hue jaise tewar aate hain

bahut zaif ko dete hai sargirani dhup

hamein to fasl-e-zamistan bahut KHush aati hai

wo ThanDi ThanDi hawa aur wo suhani dhup

lagae abr ka lukka na kis tarah chhatri

kare na chand se rangat ko aasmani dhup

ajab nahin gul-e-ruKHsar sausani ho jaen

bahaar-e-husn ko hai aafat-e-KHizani dhup

amir shaal-doshaalon mein garm rahat-o-aish

gharib ke liye jaDon mein zindagani dhup

zara si garm hawa mein ye munh banati hain

na kar sakegi gulon ki mizaj-dani dhup

muwafaqat na kabhi sard-o-garm mein hogi

hai chandni meri piri teri jawani dhup

shabab yaad dilate hai sar-safedi-e-'bahr'

hai aaftab-e-jawani ki ye nishani dhup