kabhi to josh mein aa aur rang-o-ras pe baras

kabhī to josh meñ aa aur rang-o-ras pe baras

tū abr hai to mire jism kī havas pe baras

maiñ chāhtā huuñ koī naqsh vasl kā ubhre

ai rang-e-husn mire dil ke canvas pe baras

yaqīn maan mirī zindagī meñ haiñ hī nahīñ

guzar rahe haiñ tire bin jo ye baras pe baras

uḌā ke le hī na jaa.eñ ye āñdhiyāñ mujh ko

kahīñ baras na baras mere ḳhār-o-ḳhas pe baras

sunā hai beḌiyoñ meñ mahv-e-raqs hai 'sayyad'

chaman ko chhoḌ de kaalī ghaTā qafas pe baras

kabhi to josh mein aa aur rang-o-ras pe baras

tu abr hai to mere jism ki hawas pe baras

main chahta hun koi naqsh wasl ka ubhre

ai rang-e-husn mere dil ke canwas pe baras

yaqin man meri zindagi mein hain hi nahin

guzar rahe hain tere bin jo ye baras pe baras

uDa ke le hi na jaen ye aandhiyan mujh ko

kahin baras na baras mere KHar-o-KHas pe baras

suna hai beDiyon mein mahw-e-raqs hai 'sayyad'

chaman ko chhoD de kali ghaTa qafas pe baras