kabhi to khul ke baras abr-e-mehrban ki tarah

kabhī to khul ke baras abr-e-mehrbāñ kī tarah

mirā vajūd hai jalte hue makāñ kī tarah

bharī bahār kā siina hai zaḳhm zaḳhm magar

sabā ne gaa.ī hai lorī shafīq maañ kī tarah

vo kaun thā jo barahna badan chaTānoñ se

lipaT gayā thā kabhī bahr-e-be-karāñ kī tarah

sukūt-e-dil to jazīra hai barf kā lekin

tirā ḳhulūs hai sūraj ke sā.ebāñ kī tarah

maiñ ek ḳhvāb sahī aap kī amānat huuñ

mujhe sambhāl ke rakhiyegā jism-o-jāñ kī tarah

kabhī to soch ki vo shaḳhs kis qadar thā buland

jo bichh gayā tire qadmoñ meñ āsmāñ kī tarah

bulā rahā hai mujhe phir kisī badan kā basant

guzar na jaa.e ye rut bhī kabhī ḳhizāñ kī tarah

kabhi to khul ke baras abr-e-mehrban ki tarah

mera wajud hai jalte hue makan ki tarah

bhari bahaar ka sina hai zaKHm zaKHm magar

saba ne gai hai lori shafiq man ki tarah

wo kaun tha jo barahna badan chaTanon se

lipaT gaya tha kabhi bahr-e-be-karan ki tarah

sukut-e-dil to jazira hai barf ka lekin

tera KHulus hai suraj ke saeban ki tarah

main ek KHwab sahi aap ki amanat hun

mujhe sambhaal ke rakhiyega jism-o-jaan ki tarah

kabhi to soch ki wo shaKHs kis qadar tha buland

jo bichh gaya tere qadmon mein aasman ki tarah

bula raha hai mujhe phir kisi badan ka basant

guzar na jae ye rut bhi kabhi KHizan ki tarah