kabhi to KHwab mein aao ki raat bhaari hai

kabhī to ḳhvāb meñ aao ki raat bhārī hai

bujhe charāġh jalāo ki raat bhārī hai

merī ummīd kī duniyā hai suunī suunī sī

zarā sī aas bañdhāo ki raat bhārī hai

mirā vajūd udāsī kī ek parchhā.ī

mirī hayāt pe chhāo ki raat bhārī hai

nafas nafas meñ tamannā ki hichkiyoñ kī kasak

ruḳh-e-jamīl dikhāo ki raat bhārī hai

ye niiñd hai zarā dekho sukūn-e-marg na ho

marīz-e-ġham ko jagāo ki raat bhārī hai

ḳhamīda palkoñ pe tāroñ kā bojh kaisā hai

nigāh-e-nāz uThāo ki raat bhārī hai

chaman-tarāzī-e-chashm-e-hasīñ kī tum ko qasam

kafan pe phuul sajāo ki raat bhārī hai

ḳhayāl-e-'aḳhtar'-e-marhūm se bhī baaz aao

dayār-e-huzn se jaao ki raat bhārī hai

kabhi to KHwab mein aao ki raat bhaari hai

bujhe charagh jalao ki raat bhaari hai

meri ummid ki duniya hai suni suni si

zara si aas bandhao ki raat bhaari hai

mera wajud udasi ki ek parchhai

meri hayat pe chhao ki raat bhaari hai

nafas nafas mein tamanna ki hichkiyon ki kasak

ruKH-e-jamil dikhao ki raat bhaari hai

ye nind hai zara dekho sukun-e-marg na ho

mariz-e-gham ko jagao ki raat bhaari hai

KHamida palkon pe taron ka bojh kaisa hai

nigah-e-naz uThao ki raat bhaari hai

chaman-taraazi-e-chashm-e-hasin ki tum ko qasam

kafan pe phul sajao ki raat bhaari hai

KHayal-e-'aKHtar'-e-marhum se bhi baz aao

dayar-e-huzn se jao ki raat bhaari hai