kabhi to sehn-e-ana se nikle kahin pe dasht-e-malal aaya

kabhī to sehn-e-anā se nikle kahīñ pe dasht-e-malāl aayā

hamārī vahshat pe kaisā kaisā 'urūj aayā zavāl aayā

adāvateñ thiiñ mohabbateñ thiiñ na jaane kitnī hī hasrateñ thiiñ

magar phir aisā huā ki sab kuchh maiñ ḳhud hī dil se nikāl aayā

kabhī 'ibādat kabhī 'ināyat kabhī du'ā.eñ kabhī atā.eñ

kahīñ pe dast-e-talab bane ham kahīñ pe ham tak savāl aayā

guloñ ke chehre khile hue haiñ havā meñ ḳhush-bū mahak rahī hai

ye merī āñkhoñ ne ḳhvāb dekhā ki sail-e-husn-o-jamāl aayā

tamām ranj-o-mehan ko chhoḌeñ tumhīñ ko dekheñ tumhīñ ko socheñ

baḌe zamāne ke baa'd dil meñ ye bhūlā bisrā ḳhayāl aayā

ġhazal sunā.ūñ to daad pā.ūñ magar maiñ tum se bhī kyā chhupā.ūñ

tumhī ne saare hunar sikhā.e tumhī se rañg-e-'hilāl' aayā

kabhi to sehn-e-ana se nikle kahin pe dasht-e-malal aaya

hamari wahshat pe kaisa kaisa 'uruj aaya zawal aaya

adawaten thin mohabbaten thin na jaane kitni hi hasraten thin

magar phir aisa hua ki sab kuchh main KHud hi dil se nikal aaya

kabhi 'ibaadat kabhi 'inayat kabhi du'aen kabhi ataen

kahin pe dast-e-talab bane hum kahin pe hum tak sawal aaya

gulon ke chehre khile hue hain hawa mein KHush-bu mahak rahi hai

ye meri aankhon ne KHwab dekha ki sail-e-husn-o-jamal aaya

tamam ranj-o-mehan ko chhoDen tumhin ko dekhen tumhin ko sochen

baDe zamane ke ba'd dil mein ye bhula bisra KHayal aaya

ghazal sunaun to dad paun magar main tum se bhi kya chhupaun

tumhi ne sare hunar sikhae tumhi se rang-e-'hilal' aaya