کبھی تو ذہن میں آکر نکل گئے الفاظ

کبھی تو ذہن میں آکر نکل گئے الفاظ

کبھی خود آپ ہی شعروں میں ڈھل گئے الفاظ

جنہیں سمجھتا تھا تخئیل کے معاون ہیں

قریب آ کے وہی اب بدل گئے الفاظ

نہ جانے کون سی میں بات کہنے والا تھا

نظر کسی پہ پڑی تو سنبھل گئے الفاظ

یہ سچ ہے پھندے وہی آدمی کے بنتے ہیں

غلط جو اس کی زباں سے نکل گئے الفاظ

تمہارے شہر میں جو کچھ بھی میں نے دیکھا ہے

بیان کرنے میں ان کو دہل گئے الفاظ

سنے گا کون سنائے گا کون اب ان کو

کہ سب کے ساتھ ہی شعلوں میں جل گئے الفاظ

غزل سنائی ہے پر سوز تاجؔ نے ایسی

کہ آج آنکھوں میں ان کی پگھل گئے الفاظ