kabhi to zehn mein aakar nikal gae alfaz

kabhī to zehn meñ aakar nikal ga.e alfāz

kabhī ḳhud aap hī sheroñ meñ Dhal ga.e alfāz

jinheñ samajhtā thā taḳh.īl ke muāvin haiñ

qarīb aa ke vahī ab badal ga.e alfāz

na jaane kaun sī maiñ baat kahne vaalā thā

nazar kisī pe paḌī to sañbhal ga.e alfāz

ye sach hai phande vahī aadmī ke bante haiñ

ġhalat jo us kī zabāñ se nikal ga.e alfāz

tumhāre shahr meñ jo kuchh bhī maiñ ne dekhā hai

bayān karne meñ un ko dahal ga.e alfāz

sunegā kaun sunā.egā kaun ab un ko

ki sab ke saath hī sho.aloñ meñ jal ga.e alfāz

ġhazal sunā.ī hai pur-soz 'tāj' ne aisī

ki aaj āñkhoñ meñ un kī pighal ga.e alfāz

kabhi to zehn mein aakar nikal gae alfaz

kabhi KHud aap hi sheron mein Dhal gae alfaz

jinhen samajhta tha taKHil ke muawin hain

qarib aa ke wahi ab badal gae alfaz

na jaane kaun si main baat kahne wala tha

nazar kisi pe paDi to sanbhal gae alfaz

ye sach hai phande wahi aadmi ke bante hain

ghalat jo us ki zaban se nikal gae alfaz

tumhaare shahr mein jo kuchh bhi main ne dekha hai

bayan karne mein un ko dahal gae alfaz

sunega kaun sunaega kaun ab un ko

ki sab ke sath hi shoalon mein jal gae alfaz

ghazal sunai hai pur-soz 'taj' ne aisi

ki aaj aankhon mein un ki pighal gae alfaz