kabhi uDo to sahi tum uDan se upar

kabhī uḌo to sahī tum uḌaan se uupar

fazā.eñ aur bhī haiñ āsmān se uupar

mirā safīna ajab kashmakash meñ tairtā thā

havā sukūt meñ thī bādbān se uupar

kisī ne sach na kahā aur sab ne sach jaanā

ajab kamāl-e-bayāñ thā bayān se uupar

mire harīf ke sab tiir be-ḳhatā to na the

magar vo dast-e-amāñ thā kamān se uupar

kisī ne aaj hī paanī meñ paañv Daalā hai

chalā hai aaj hī dariyā nishān se uupar

mirā qabīla tah-e-āsmāñ hai be-ḳhemā

yaqīñ kī had hai magar har gumān se uupar

agar ye qāfila merā nahīñ to phir 'at.har'

hai kis alaav kā partav chaTān se uupar

kabhi uDo to sahi tum uDan se upar

fazaen aur bhi hain aasman se upar

mera safina ajab kashmakash mein tairta tha

hawa sukut mein thi baadban se upar

kisi ne sach na kaha aur sab ne sach jaana

ajab kamal-e-bayan tha bayan se upar

mere harif ke sab tir be-KHata to na the

magar wo dast-e-aman tha kaman se upar

kisi ne aaj hi pani mein panw Dala hai

chala hai aaj hi dariya nishan se upar

mera qabila tah-e-asman hai be-KHema

yaqin ki had hai magar har guman se upar

agar ye qafila mera nahin to phir 'athar'

hai kis alaw ka partaw chaTan se upar