kabhi us par yun bhi mera asar jae

kabhī us par yuuñ bhī merā asar jaa.e

galī se merī guzre to Thahar jaa.e

vo bhī gar be-dilī se Thukrā de mujh ko

to phir ye dil kise chāhe kidhar jaa.e

nahīñ chāhat mujhe ab ghar sajāne kī

jī to kartā hai ab sab kuchh bikhar jaa.e

guzartī hai qayāmat mere is dil par

kabhī jo sāmne se vo guzar jaa.e

hai jaadū uñgliyoñ meñ is qadar us kī

ki jis ko pyaar se chhū le nikhar jaa.e

yahī ik iltijā hai chāñd se merī

kabhī āñgan meñ utre to Thahar jaa.e

kaho 'satyārth' kuchh yuuñ baat tum apnī

ki har ik shaḳhs par is kā asar jaa.e

kabhi us par yun bhi mera asar jae

gali se meri guzre to Thahar jae

wo bhi gar be-dili se Thukra de mujh ko

to phir ye dil kise chahe kidhar jae

nahin chahat mujhe ab ghar sajaane ki

ji to karta hai ab sab kuchh bikhar jae

guzarti hai qayamat mere is dil par

kabhi jo samne se wo guzar jae

hai jadu ungliyon mein is qadar us ki

ki jis ko pyar se chhu le nikhar jae

yahi ek iltija hai chand se meri

kabhi aangan mein utre to Thahar jae

kaho 'satyarth' kuchh yun baat tum apni

ki har ek shaKHs par is ka asar jae