kabhi use to kabhi KHud ko dekhte rahna

kabhī use to kabhī ḳhud ko dekhte rahnā

isī madār meñ din raat ghūmte rahnā

ham apnā farz kareñge adā ba-har sūrat

hamārā kaam hai rāheñ tarāshte rahnā

vo mahv honā mirā shaam se tirī dhun meñ

tamām raat tirī raah dekhte rahnā

na hone denā kabhī past hausloñ kī fasīl

kamand chāñd sitāroñ pe Dālte rahnā

uThā.e rakhnā isī ik usuul kā parcham

burā na karnā bhalā sab kā chāhte rahnā

najāt tīra-shabī se jo chāhte ho 'zafar'

nuqūsh-e-sub.h-e-daraḳhshāñ ubhārte rahnā

kabhi use to kabhi KHud ko dekhte rahna

isi madar mein din raat ghumte rahna

hum apna farz karenge ada ba-har surat

hamara kaam hai rahen tarashte rahna

wo mahw hona mera sham se teri dhun mein

tamam raat teri rah dekhte rahna

na hone dena kabhi past hauslon ki fasil

kamand chand sitaron pe Dalte rahna

uThae rakhna isi ek usul ka parcham

bura na karna bhala sab ka chahte rahna

najat tira-shabi se jo chahte ho 'zafar'

nuqush-e-subh-e-daraKHshan ubhaarte rahna