kabhi utren agar poshak ke rang

kabhī utreñ agar poshāk ke rañg

falak dekhegā merī ḳhaak ke rañg

baḌī mushkil meñ hai ab ye zamīñ-zād

judā kar ḳhaak se aflāk ke rañg

kahīñ dekho izāfī kuchh nahīñ hai

bahut pheñke haiñ us ne taak ke rañg

kahānī hai koī dariyā meñ zinda

lab-e-dariyā ajab haiñ ḳhaak ke rañg

ye qissa hī agar hai gumrahī kā

to kyā chamkeñ yahāñ idrāk ke rañg

falak ne faisla kuchh kar liyā hai

ki maddham paḌ rahe haiñ ḳhaak ke rañg

vahī hai haal mere dil kā 'ḳhāvar'

vahī hai dīda-e-nam-nāk ke rañg

kabhi utren agar poshak ke rang

falak dekhega meri KHak ke rang

baDi mushkil mein hai ab ye zamin-zad

juda kar KHak se aflak ke rang

kahin dekho izafi kuchh nahin hai

bahut phenke hain us ne tak ke rang

kahani hai koi dariya mein zinda

lab-e-dariya ajab hain KHak ke rang

ye qissa hi agar hai gumrahi ka

to kya chamken yahan idrak ke rang

falak ne faisla kuchh kar liya hai

ki maddham paD rahe hain KHak ke rang

wahi hai haal mere dil ka 'KHawar'

wahi hai dida-e-nam-nak ke rang