kabhi yun bhi karo shahr-e-guman tak le chalo mujhko

kabhī yuuñ bhī karo shahr-e-gumāñ tak le chalo mujh ko

jahāñ tak raushnī hai tum vahāñ tak le chalo mujh ko

bhaTaktā jā rahā huuñ rāh-rau miltā nahīñ koī

ġhubār-e-rāh mere kārvāñ tak le chalo mujh ko

ġham-e-āvārgī se maiñ shikasta hotā jaatā huuñ

parindo tum hī apne āshiyāñ tak le chalo mujh ko

ḳhamoshī jhel lī maiñ ne rihā.ī kī ghaḌī aa.ī

suḳhan ke vāste lafz-o-bayāñ tak le chalo mujh ko

kisī ta.abīr kī manzil se yā to āshnā kar do

nahīñ to phir usī ḳhvāb-e-girāñ tak le chalo mujh ko

'tarāz' ab to tahaffuz kī koī sūrat nahīñ miltī

mire rahbar kisī jā-e-amāñ tak le chalo mujh ko

kabhi yun bhi karo shahr-e-guman tak le chalo mujh ko

jahan tak raushni hai tum wahan tak le chalo mujh ko

bhaTakta ja raha hun rah-rau milta nahin koi

ghubar-e-rah mere karwan tak le chalo mujh ko

gham-e-awargi se main shikasta hota jata hun

parindo tum hi apne aashiyan tak le chalo mujh ko

KHamoshi jhel li main ne rihai ki ghaDi aai

suKHan ke waste lafz-o-bayan tak le chalo mujh ko

kisi tabir ki manzil se ya to aashna kar do

nahin to phir usi KHwab-e-giran tak le chalo mujh ko

'taraaz' ab to tahaffuz ki koi surat nahin milti

mere rahbar kisi ja-e-aman tak le chalo mujh ko