kabhi zarra kabhi mauj-e-rawan hai

kabhī zarra kabhī mauj-e-ravāñ hai

haqīqat hai nihāñ garche ayaañ hai

taġhayyur se ibārat ye jahāñ hai

ibārat meñ taġhayyur par kahāñ hai

zamāñ bhī hai safar meñ aur makāñ bhī

tasalsul meñ nihāñ isbāt-e-jāñ hai

jahāñ taḳhlīq o ḳhāliq ham-zabāñ haiñ

vahāñ har jumbish-e-lab kun-fakāñ hai

manāzil-dar-manāzil haiñ safar meñ

safar manzil hai manzil kārvāñ hai

sabā mastūr hai parde meñ lekin

sabā kā naqsh har gul par ayaañ hai

malā.ik bhī jhukeñ labbaik kah kar

anal-haq kī fuġhāñ aisī azaañ hai

farishtoñ ke paroñ ko chhū ke guzre

ye naqsh-e-pā-e-ḳhākī āsmāñ hai

mire dam se maqālāt-e-azal haiñ

mire dam se abad kī dāstāñ hai

mirā virsa junūñ kī ābiyārī

mirī mīrās tarkīb-e-fuġhāñ hai

maiñ hast-o-būd ke bas meñ nahīñ huuñ

mire bas meñ hayāt-e-jāvidāñ hai

tasavvur se harīm-e-zāt 'tal.at'

kabhī ātish kabhī ātish-fishāñ hai

kabhi zarra kabhi mauj-e-rawan hai

haqiqat hai nihan garche ayan hai

taghayyur se ibarat ye jahan hai

ibarat mein taghayyur par kahan hai

zaman bhi hai safar mein aur makan bhi

tasalsul mein nihan isbaat-e-jaan hai

jahan taKHliq o KHaliq ham-zaban hain

wahan har jumbish-e-lab kun-fakan hai

manazil-dar-manazil hain safar mein

safar manzil hai manzil karwan hai

saba mastur hai parde mein lekin

saba ka naqsh har gul par ayan hai

malaik bhi jhuken labbaik kah kar

anal-haq ki fughan aisi azan hai

farishton ke paron ko chhu ke guzre

ye naqsh-e-pa-e-KHaki aasman hai

mere dam se maqalat-e-azal hain

mere dam se abad ki dastan hai

mera wirsa junun ki aabiyari

meri miras tarkib-e-fughan hai

main hast-o-bud ke bas mein nahin hun

mere bas mein hayat-e-jawidan hai

tasawwur se harim-e-zat 'talat'

kabhi aatish kabhi aatish-fishan hai