kabhu dikha ke kamar aur kabhu dahan mujhko

kabhū dikhā ke kamar aur kabhū dahāñ mujh ko

bahut ba-tañg kiyā tū ne ai miyāñ mujh ko

vo din ga.e ki uThāte the yaar nik.hat-e-gul

hai be-dimāġhī-e-dil in diloñ girāñ mujh ko

maiñ rah-guzar meñ paḌā huuñ ba-rañg-e-naqsh-e-qadam

maiñ chhoḌā kis ke bharose pe kārvāñ mujh ko

maiñ huuñ to murġh-e-chaman par ġhalat-nigāhī se

haiñ kitne roz ki bhūlā hai āshiyāñ mujh ko

to itne vāste ai bāġhbāñ na kāvish kar

bahut hai sāya-e-dīvār-e-gulsitāñ mujh ko

ravā rakhūñ na ki hove malak bhī paas mire

kiyā hai bas-ki mohabbat ne bad-gumāñ mujh ko

mirī nazar meñ hai 'qā.em' ye kā.enāt tamām

nazar meñ go koī laatā nahīñ hai yaañ mujh ko

kabhu dikha ke kamar aur kabhu dahan mujh ko

bahut ba-tang kiya tu ne ai miyan mujh ko

wo din gae ki uThate the yar nikhat-e-gul

hai be-dimaghi-e-dil in dilon giran mujh ko

main rah-guzar mein paDa hun ba-rang-e-naqsh-e-qadam

main chhoDa kis ke bharose pe karwan mujh ko

main hun to murgh-e-chaman par ghalat-nigahi se

hain kitne roz ki bhula hai aashiyan mujh ko

to itne waste ai baghban na kawish kar

bahut hai saya-e-diwar-e-gulsitan mujh ko

rawa rakhun na ki howe malak bhi pas mere

kiya hai bas-ki mohabbat ne bad-guman mujh ko

meri nazar mein hai 'qaem' ye kaenat tamam

nazar mein go koi lata nahin hai yan mujh ko