kabhu na us ruKH-e-raushan pe chhaiyan dekhin

kabhū na us ruḳh-e-raushan pe chhā.iyāñ dekhīñ

ghaTā.eñ chāñd pe sau baar chhā.iyāñ dekhīñ

fatādgī meñ jo izzat hai sar-kashī meñ kahāñ

ki naqsh-e-pā kī yahāñ rah-numā.iyāñ dekhīñ

balā.eñ leve hai hāthoñ se us kī zulfoñ kī

ye dast-e-shāna kī ham ne rasā.iyāñ dekhīñ

chaman meñ nāḳhun-e-har-barg-e-gul se bulbul kī

hazār rañg se uqda-kushā.iyāñ dekhīñ

zabān-e-tesha bahut kaam aa.ī ai farhād

jo ishq ne tirī zor-āzmā.iyāñ dekhīñ

nazar meñ apnī vo phirtī haiñ sūrateñ haihāt

falak ne ḳhaak meñ kyā kyā milā.iyāñ dekhīñ

kisū ne lī na ḳhabar ġharq-e-bahr-e-ulfat kī

in āshnāoñ kī ye āshnā.iyāñ dekhīñ

hamārī us kī kudūrat kī vaj.h kuchh na rahī

ki aa.ine ne diloñ kī safā.iyāñ dekhīñ

ham apnā tujh ko havā-ḳhvāh jānte the sabā

bahāreñ tū ne bhī tanhā uḌā.iyāñ dekhīñ

bayān kis se karūñ apnī tīra-baḳhtī kā

añdherī rāteñ vo ai dil phir ā.iyāñ dekhīñ

'nasīr' kiije vafā kab talak ba-qaul-e-'mīr'

jafā.eñ dekh liyāñ bevafā.iyāñ dekhīñ

kabhu na us ruKH-e-raushan pe chhaiyan dekhin

ghaTaen chand pe sau bar chhaiyan dekhin

fatadgi mein jo izzat hai sar-kashi mein kahan

ki naqsh-e-pa ki yahan rah-numaiyan dekhin

balaen lewe hai hathon se us ki zulfon ki

ye dast-e-shana ki hum ne rasaiyan dekhin

chaman mein naKHun-e-har-barg-e-gul se bulbul ki

hazar rang se uqda-kushaiyan dekhin

zaban-e-tesha bahut kaam aai ai farhad

jo ishq ne teri zor-azmaiyan dekhin

nazar mein apni wo phirti hain suraten haihat

falak ne KHak mein kya kya milaiyan dekhin

kisu ne li na KHabar gharq-e-bahr-e-ulfat ki

in aashnaon ki ye aashnaiyan dekhin

hamari us ki kudurat ki wajh kuchh na rahi

ki aaine ne dilon ki safaiyan dekhin

hum apna tujh ko hawa-KHwah jaante the saba

bahaaren tu ne bhi tanha uDaiyan dekhin

bayan kis se karun apni tira-baKHti ka

andheri raaten wo ai dil phir aaiyan dekhin

'nasir' kije wafa kab talak ba-qaul-e-'mir'

jafaen dekh liyan bewafaiyan dekhin