kabhu tak ke dar ko khaDe rahe kabhu aah bhar ke chale gae

kabhū tak ke dar ko khaḌe rahe kabhū aah bhar ke chale ga.e

tire kūche meñ jo ham aa.e bhī to Thahar Thahar ke chale ga.e

ga.e baaġh meñ kisī gul tale to vahāñ bhī apnā na jī lagā

le ba-rañg-e-ġhuncha jamā.iyāñ tujhe yaad kar ke chale ga.e

kahīñ ġhash meñ thā maiñ paḌā huā suno aur qahr kī baat tum

mujhe dekhne ko jo aa.e vo to bigaḌ sañvar ke chale ga.e

karūñ mū o zulf kā kyā bayāñ ki ajiib qissa hai darmiyāñ

ye idhar ko siine pe aa rahī vo udhar kamar ke chale ga.e

ab aniis hai na jalīs hai na rafīq hai na shafīq hai

ham akele ghar meñ paḌe rahe sabhī log ghar ke chale ga.e

ye ajab zamāne kī rasm hai ki jinhoñ pe marte the ham sadā

pas-e-marg aa vahī ḳhaak meñ hameñ aah dhar ke chale ga.e

chaḌhe koThe par to the 'mus.hafī' pa na daav par vo mire chaḌhe

maiñ chaḌhā.ūñ jab talak āstīñ uThe aur utar ke chale ga.e

kabhu tak ke dar ko khaDe rahe kabhu aah bhar ke chale gae

tere kuche mein jo hum aae bhi to Thahar Thahar ke chale gae

gae bagh mein kisi gul tale to wahan bhi apna na ji laga

le ba-rang-e-ghuncha jamaiyan tujhe yaad kar ke chale gae

kahin ghash mein tha main paDa hua suno aur qahr ki baat tum

mujhe dekhne ko jo aae wo to bigaD sanwar ke chale gae

karun mu o zulf ka kya bayan ki ajib qissa hai darmiyan

ye idhar ko sine pe aa rahi wo udhar kamar ke chale gae

ab anis hai na jalis hai na rafiq hai na shafiq hai

hum akele ghar mein paDe rahe sabhi log ghar ke chale gae

ye ajab zamane ki rasm hai ki jinhon pe marte the hum sada

pas-e-marg aa wahi KHak mein hamein aah dhar ke chale gae

chaDhe koThe par to the 'mushafi' pa na daw par wo mere chaDhe

main chaDhaun jab talak aastin uThe aur utar ke chale gae