کڑی دھوپ میں سایہ آور بہت ہے

کڑی دھوپ میں سایہ آور بہت ہے

مری ماں کا آنچل ہے سر پر بہت ہے

ہوس کے لئے ہیں یہ ایوان تھوڑے

قناعت کو اک پھوس کا گھر بہت ہے

وہ سورج ہے بے شک مگر اس کے آگے

مرا ہونا ذرہ برابر بہت ہے

محافظ ہے جو کارواں کا ہمارے

اسی شخص سے تو ہمیں ڈر بہت ہے

مبارک ہو کمخواب کا تم کو بستر

ہمیں ٹاٹ کی ایک چادر بہت ہے

اے ایمان والو یہ نشتر ہے پنہاں

کہ اب خیر کے نام پر شر بہت ہے

وفاؔ دل کی تشنہ لبی کے لئے تو

بس اخلاص کا ایک ساغر بہت ہے